கவுஜை தொகுப்பு போடுவது எப்படி?

'அண்ணாச்சி, கவிதை தொகுப்பு போடலியா நீங்க?' என்று கேட்டார் நண்பர் ஒருவர்.
உண்மைதான். ஒரு மனுசன் வறுமைக்கோட்டுக்குக் கீழயாவது இருக்கலாம். ஆனால் அதுக்காக கவிதைத் தொகுப்பு போடாம மட்டும் இருந்துடவே கூடாதுங்குறதுதான் தமிழ் கூறும் நல்லுலகத்துக் கவிஞர் பெருமக்களின் ஆசையாக இருக்கிறது. 'சென்றிடுவீர் அச்சகமெங்கும். அடித்திடுவீர் கவிதைத்தொகுப்புகளை' என்பதுதான் ஆவேசம் தரும் முழக்கமாக இருக்கிறது.

இப்படி உரத்த முழக்கம் ஊரெல்லாம் கேட்கும்போது, செவிட்டுக் காதோடு எத்தனைக் காலம்தான் வாழ முடியும் ஒரு மனிதனால்? எல்லா மனிதர்களுக்குள்ளேயும் கவுஜை எச்சிலை விட மோசமாக ஊறுகிறது என்பது புதுக்கவிதை மடையைத் திறந்த நாளிலிருந்தே எல்லா கவுஞனுக்கும் தெரிஞ்ச விசயமாக இருக்கிறது.. எல்லாரும் இந்நாட்டு மன்னரோ இல்லையோ எல்லாரும் இந்நாட்டு கவுஞர் என்பது மட்டும் உலகக் கோப்பையில் பங்களாதேசிடம் பல்லடி பட்ட இந்திய அணி போல சத்தியமான உண்மை.

ஒரு மன்னனுக்கு தான் எழுதியதை தானே பதிப்பித்துப் பார்க்கும் ஆசை வரக்கூடாதா? வந்தால்தான் அவன் கவுஞன். ஆக, எப்படி தனிமனிதனுக்கு மின்னஞ்சல் முகவரியும், வலைப்பூ முகவரியும் தவிர்க்க முடியாததாகி விட்டதோ அதே போலத்தான் கவுஜை பொஸ்தவமும் கவுஞனுக்கு தவிர்க்க முடியாததாகிறது.

பஞ்சாங்கக்குறிப்பு கூடத்தான் புத்தகம்ங்குற அடைமொழியோட விக்குது. அதே மாதிரி சாணித்தாள்ல அடிச்சா கவுஜைக்கும் அந்தத் தாளுக்கும் வித்தியாசம் தெரியாம போயிடும் வாய்ப்பு இருக்குறதால, கவுஜை புஸ்தவம் போடுறதுக்கு முன்னால சில அடிப்படையான விசயங்களைத் தெரிஞ்சுக்கலாம்.

கவுஜைத் தொகுப்புங்குறது எப்படியும் விலாச அட்டைக்கு பதிலா கொடுக்கப் போற விசயம்கறதால அதைக் கொஞ்சம் மெலிசா தயாரிச்சா அது கவுஞரான உங்களுக்கும் வாசிக்கப் போறவனுக்கும் நல்லது.

கவுஜை பொஸ்தவம் போடுறதுன்னு முடிவெடுத்துட்டா உடனே கவுஜை எழுதித் தொலைச்சுடாதீங்க. ஒரு கவுஜைத் தொகுப்புக்கு கட்டக்கடைசிலதான் கவுஜை தேவைப்படும். என்ன இது அநியாயமா இருக்கு?'ன்னு முறைக்காதீங்க.தெளிவாத்தான் சொல்றேன்.

கவுஜை தொகுப்பு போடுறதுன்னு தீர்மானிச்சதும் சிரைக்குறதை விட்டுடுங்க மொதல்ல. காசா, பணமா தாடி பாட்டுக்கு வளர்ந்து தொலையட்டும்னு விடுங்க. கவுஞனா இருந்து தாடியும் இருந்தா கவுஜைக்கு மருவாதை அதிகம்தான். என்னை மாதிரியே உங்களுக்கும் தாடி வளராம அழிச்சாட்டியம் பண்ணுதுன்னா அப்படியே விட்டுட வேண்டியதுதான்.

இனி தினமும் ஒரு முக்கியமான பயிற்சியை மேற்கொள்ளனும்.'பிசியோதெரபி' மாதிரி இது கவியோதெரபி. ஒரே இடத்தை ஒரு 30 டிகிரி கோணத்துல தலையை சாய்ச்சுகிட்டு மொறச்சு பார்க்கணும். இப்படி ஒரு நாளைக்கு 10 நிமிசம் செஞ்சு பழகிக்கோங்க. முக்கியமான விசயம் என்னன்னா, அப்படிச் செய்யும்போது பக்கத்துல ஆட்கள் இல்லாம பார்த்துக்கோங்க,. இல்லேன்னா எங்கயோ பாக்குறீங்கன்னு நெனச்சு உங்களை போட்டுத் தள்ளிடப் போறாங்க.

இந்தப் பயிற்சி முடிஞ்சதும் அடுத்த பயிற்சி முக்கியமானது. வானத்தை உத்துப் பார்க்குற பயிற்சி. ஏதோ கெட்ட கவுஜையை வாசிச்ச மாதிரி நெனச்சுக்கிட்டு முகத்தை உக்கிரமா வச்சுக்கிட்டு வானத்தை மொறச்சுப் பார்க்கணும். இதுவும் தினம் 10 நிமிசம் பயிற்சியோட செய்யுங்க.

இந்த பயிற்சி ஒருவாரம் முடிஞ்சதுன்னா நீங்க முதல ்கட்டத்துக்கு தயாராயிட்டீங்கன்னு அர்த்தம். இனி இந்தப் பயிற்சியில் இருக்கும்போதே உங்க நண்பர் மூலமா ஒரு படம் எடுத்துக்கோங்க. சபாஷ்!! இந்தப் படம்தான் உங்க கவுஜை தொகுப்புக்கான ஆதாரம்.

கவுஜை - அதை மெதுவா எழுதிக்கலாம்யா. அதுக்கும் முன்னாலே இன்னும் செய்ய வேண்டியிருக்கு நெறய..

(மீதி நாளைக்கு)